Ակումբի «Ծանր մետաղները ջրում» թիմը  մշակել է մի մեթոդ, որը նոր կիրառություն է պլաստիկների վերամշակման համար։ Այն օգտագործվում է ծանր մետաղներով աղտոտված ջրի բուժման համար, և նրա առավելությունն այն է, որ նրա շնորհիվ հնարավոր է լինում կլանել բազմաթիվ մետաղական իոններ, բարելավվում է ջրի որակը, ինչպես նաև ստեղծվում է երկար ցիկլային կայունություն: Թիմը տարվա ընթացքում, օպտիմալ ջերմաստիճան որոշելով, սորբենտի ստացման և օգտագործման գործընթացները հաշվի առնելով, նախագծել է արդյունաբերական սարք, որը լավագույնս համապատասխանում է այս նախագծին։ Նախագիծը Հայկական համադպրոցական գիտության փառատոնի հաղթող է ճանաչվել և սեպտեմբերին մասնակցելու է Լատվիայում կայանալիք The European Union Contest for Young Scientists  (EUCYS) – 2025 միջազգային փառատոնին։ Թիմը Հայկական համադպրոցական գիտության փառատոնի «Քիմիա» անվանակարգում զբաղեցրել է նաև I կարգի մրցանակ և հաջողությամբ ներկայացվել ու մրցանակի արժանացել Գագիկ Գրիգորյանի անվան համադպրոցական գիտության փառատոնում։ Թիմը մասնակցել է նաև Diamond Challenge մրցույթին և նախագիծը ներկայացրել դրա կիսաեզրափակիչ փուլին։

TerraFix. Մեր օրերում գյուղատնտեսական տարածքների անխնա և մեծածավալ շահագործումը բերել է հողերի որակի և բերրիության նվազմանը (դեգրադացմանը, որը հաճախ շփոթում են էրոզիայի հետ) և այլ բազմաթիվ խնդիրների։ Թիմը ստեղծել է էկոհամակարգի համար անվտանգ մի այնպիսի կոմպոստանման նյութ, որը թույլ է տալիս հնարավորինս կարճ ժամկետներում վերադարձնել հողն իր նախնական վիճակին։ Թիմը Հայկական համադպրոցական գիտության փառատոնում «Քիմիա» անվանակարգում զբաղեցրել է II կարգի մրցանակ։ Նախագիծը հաջողությամբ ներկայացվել և մրցանակի է արժանացել նաև Գագիկ Գրիգորյանի անվան համադպրոցական գիտության փառատոնում։ Թիմը մասնակցել է նաև Diamond Challenge մրցույթին և նախագիծը ներկայացրել կիսաեզրափակիչ փուլում։

Flextract. Նախագիծը նռան ու սուրճի հիմքով ստեղծել է հակաբակտերային կենսաքայքայվող թաղանթներ, որոնք ծառայելով որպես սննդի փաթեթավորման միջոց՝ երկարացնում են մթերքի արդյունավետ պահպանման ժամկետը։ Քանի որ այս թաղանթները կենսաքայքայվող են,  նախագիծը ստանում է երկակի նշանակություն. լուծում է մեր մոլորակի համար վտանգ ներկայացնող երկու համաշխարհային խնդիր՝ պլաստիկներով աղտոտվածության և սննդային թափոնների աճի։ Թիմը Հայկական համադպրոցական գիտության փառատոնի «Քիմիա» անվանակարգում զբաղեցրել է I կարգի մրցանակ։ Նախագիծը հաջողությամբ ներկայացվել և մրցանակի է արժանացել նաև Գագիկ Գրիգորյանի անվան համադպրոցական գիտության փառատոնում։ Թիմը մասնակցել է նաև Diamond Challenge մրցույթին և նախագիծը ներկայացրել կիսաեզրափակիչ փուլում։

HydroFlex PamPlant. Բույսերի աճի և զարգացման վրա խոնավության պակասը թողնում է լուրջ բացասական ազդեցություն՝ դանդաղեցնելով ծլումը, սահմանափակելով տերևների աճը և թուլացնելով ցողունները։ Վերամշակելով տակդիրներից ստացված պոլիակրիլատը, որը ծառայել է որպես հողում խոնավապահպանման հավելում՝ նախագծի թիմն ուսումնասիրել է դրա ազդեցությունը բազմաթերթ զանգակի աճի վրա։ Նախագիծը հաջողությամբ ներկայացվել է Գագիկ Գրիգորյանի անվան համադպրոցական գիտության փառատոնում և արժանացել «Լավագույն գաղափար» մրցանակին։