Երկարատև ուսումնասիրության արդյունքում ակումբը վերհանել է գերեզմանոցների խորքային խնդիրները՝ հասկանալով, որ գերեզմանոցները գրավում են հսկայական տարածքներ, հաճախ վերածվում ամայի ու մոռացված վայրերի՝ խաթարելով քաղաքի բնականոն զարգացումը։ Ակումբի անդամներն առաջարկում են այլընտրանքային լուծում, որի շնորհիվ գերեզմանոցներն այլևս չեն վանի մարդկանց իրենց ճնշող մթնոլորտով, այլ կնպաստեն տարածքի խնայողությանը և կլինեն էկոլոգիապես մաքուր։ Նախագիծն ամբողջությամբ մշակվել է «Քաղաքախաղ» ակումբի անդամների կողմից։ Մեկ ուսումնական տարվա ընթացքում այն անցել է երկար ճանապարհ։ Այդ ընթացքում աշակերտները քննարկել են գաղափարը տարբեր մասնագետների հետ և որպես վերջնարդյունք ներկայացրել իրենց կողմից առաջարկվող տարբերակի մակետը։